PROLEGOMENA II

Quis fuit Iūstīniānus?

Iūstīniānus fuit imperātor imperiī Rōmānī Orientālīs.

Vbī nātus est?

Iūstīniānus apud Scupos, hodiē Skopie, caput Reī Pūblicae Macedoniae, nātus est.

Quō annō nātus est?

Iūstīniānus annō 482 p.C.n. nātus est.

Quō annō Iūstīniānus ē uītā excessit?

Annō 565 Iūstīniānus imperātor ē uītā excessit.

Quam linguam ā pārentibus suīs Iūstīniānus puer didicit?

Lingua māterna Iūstīniānō lingua Latīna fuit. Fortasse Iūstīniānus fuit ultimus imperātor cuī lingua Latīna lingua māterna fuit.

Quae bella Iūstīniānus gessit?

Iūstīniānus multa bella gessit, et imperium Rōmānum redintegrāre cōnātus est. Bella contrā Vandalōs in Africā, contrā Ostrogothōs in Italiā, contrā

Visigothōs in Hispāniā et contrā Persās gessit.

In proemiō Īnstitūtiōnum dīcit:

"et bellicōs quidem sūdōrēs nostrōs barbaricae gentēs sub iuga nostra dēductae cōgnōscunt et tam Africa quam aliae innumerōsae prōvinciae post tanta temporum spatia nostrīs victōriīs [...] iterum diciōnī Rōmānae nostrōque additae imperiō prōtestantur".

Quae opera ad iūs Rōmānum pertinentia Iūstīniānus scrīpsit?

Rēuērā Iūstīniānus opera quae nōmen suum habent nōn scrīpsit, sed iūris prūdentēs quī in rēgia (siue palātiō) nōmine suō operam dabant.

In proemiō Īnstitūtiōnum dīcit:

"Tribōniānō, virō magnificō, magistrō et ex quaestōre sacrī palātiī nostrī, nec nōn Theophilō et Dorotheō, virīs illūstribus, antecessōribus, [...], convocātīs, speciāliter mandāvimus ut nostrā auctōritāte nostrīsque suāsiōnibus compōnant Īnstitūtiōnēs"

Quae sunt opera quae Iūstīniānus facienda cūrāuit?

Īnstitūtiōnēs iūris cīuīlis est opus dē iūre Rōmānō quod iūris prūdentēs iussū Iūstīniānī scrīpsērunt, alia opera aetātis recentiōris sequentēs, praesertim Īnstitūtiōnēs Gāiī, opus quod ad saeculum II p.C.n. pertinet.

Īnstitūtiōnēs iūris cīuīlis est prīma pars operis magnī quod corpus iūris Cīuīlis īnscrībitur, compendium maximum omnis iūris cīuīlis.

In proemiō Īnstitūtiōnum dīcit:

• "tunc nostram extendimus cūram et ad immēnsa prūdentiae veteris volūmina et opus dēspērātum" 
• "Igitur post librōs quīnquāginta dīgestōrum seu pandectārum, in quōs omne iūs antīquum collātum est"

Quem ad fīnem / Cūr Iūstīniānus illud opus  compōnere instituit?

"ut liceat vōbīs prīma lēgum cūnābula nōn ab antīquīs fābulīs discere, sed ab imperiālī splendōre appetere, et tam aurēs quam animae vestrae nihil inūtile nihilque perperam positum, [...], accipiant, et quod in priōre tempore vix post quadriennium priōribus contingēbat, [...], hoc vōs ā prīmōrdiō ingrediāminī, [...]".

uōbīs : iī quī studiō iūris cīuīlis operam datis

"ut sint tōtīus lēgitimae scientiae prīma elementa"

Dē quō agitur hōc in opere?

Prīmōrdia dē iūre cīuīlī tractantur.

• Liber I: dē iūre et dē persōnīs 
• Liber II: dē rēbus 
• Liber III: dē hērēditātēs et aliīs 
• Liber IV: dē obligātiōnibus

"Quibus breviter expositum est et quod anteā optinēbat et quod posteā dēsuētūdine inumbrātum ab imperiālī remediō illūminātum est".

Fontēs huius operis quī sunt? Vnde praecepta uirī iūris prūdentēs exhauriant?

"Quās [īnstitūtiōnēs] ex omnibus antīquōrum īnstitūtiōnibus et praecipuē ex commentāriīs Gāiī nostrī tam īnstitūtiōnum quam rērum cottīdiānārum aliīsque multīs commentāriīs compositās"

Vt compendiōsē dīcāmus, quā dē causā īnstitūtiōnēs Iūstīniānī opus est nōn tantum magnī sed maximī mōmentī?

Quod per saecula liber fuit cuī iī quī iūris prūdentēs esse uolēbant studēbant ut prīma elementa / prīmōrdia / cūnābula iūris cīuīlis Rōmānī scīrent.

LIBER I, TITVLVS III: DE IVRE PERSONARVM

Summa dē iūre persōnārum.

Summa itaque dīvīsiō dē iūre persōnārum haec est, quod omnēs hominēs aut līberī sunt aut servī.

Et lībertās quidem est, ex quā etiam līberī vocantur, nātūrālis facultās ēius quod cuīque facere libet, nisi sī quid aut vī aut iūre prohibētur.

Servitūs autem est cōnstitūtiō iūrīs gentium, quā quis dominiō aliēnō contrā nātūram subīcitur. Servī autem ex eō appellātī sunt, quod imperātōrēs captīvōs vendere iubent ac per hoc servāre nec occīdere solent: quī etiam mancipia dictī sunt, quod ab hostibus manū capiuntur.

Servī autem aut nāscuntur aut fīunt. Nāscuntur ex ancillīs nostrīs: fīunt aut iūre gentium, id est ex captīvitāte, aut iūre cīvīlī, velutī cum homō liber māior vīginti annīs ad pretium participandum sēsē vēnumdarī passus est.

In servōrum condiciōne nūlla differentia est. In līberīs multae differentiae sunt: aut enim ingenuī sunt aut lībertīnī.

Dē ingenuīs

Ingenuus is est quī statim ut nātus est liber est, sīve ex duōbus ingenuīs mātrimōniō ēditus, sīve ex lībertīnīs, sīve ex alterō lībertīnō, alterō ingenuō. Sed et sī quis ex mātre līberā nāscātur, patre servō, ingenuus nihilō minus nāscitur: quemadmodum quī ex mātre līberā et incertō patre nātus est, quoniam vulgō conceptus est.

Sufficit autem līberam fuisse mātrem eō tempore quō nāscitur, licet ancilla concēperit. Et ex contrāriō sī lībera concēperit, deinde ancilla facta pariat, placuit eum quī nāscitur līberum nāscī, quia nōn dēbet calamitās mātris eī nocēre quī in uterō est.

Ex hīs et illud quaesītum est, sī ancilla praegnāns manūmissa sit, deinde ancilla posteā facta peperit, līberum an servum pariat? et Mārcellus probat, līberum nāscī: sufficit enim eī quī in ventre est līberam mātrem vel mediō tempore habuisse: quod et vērum est. Cum autem ingenuus aliquis nātus sit, nōn officit illī in servitūte fuisse et posteā manūmissum esse: saepissime enim cōnstitūtum est, nātālibus nōn officere manūmissiōnem.

Dē lībertīnīs

Lībertīnī sunt quī ex iūstā servitūte manūmissī sunt.

Manūmissiō autem est  datiō lībertātis: nam quamdiū quis in servitūte est, manuī et potestātī suppositus est, et manūmissus līberātur potestāte. Quae rēs ā iūre gentium orīginem sūmpsit, utpote cum iūre nātūrālī omnēs līberī nāscerentur nec esset nōta manūmissiō, cum servitūs esset incōgnita: sed posteāquam iūre gentium servitūs invāsit, secūtum est beneficium manūmissiōnis.

Et cum ūnō nātūrālī nōmine hominēs appellārēmur, iūre gentium tria genera hominum esse coepērunt, līberī et hīs contrārium servī et tertium genus lībertīnī, quī dēsierant esse servī.

Multīs autem modīs manūmissiō prōcēdit: aut enim ex sacrīs cōnstitūtiōnibus in sacrōsānctīs ecclēsiīs aut vindictā aut inter amīcōs aut per epistulam aut per testāmentum aut aliam quamlibet ultimam voluntātem. Sed et aliīs multīs modīs lībertās servō competere potest, quī tam ex veteribus quam nostrīs cōnstitūtiōnibus intrōductī sunt. Servī vērō ā dominīs semper manūmittī solent, adeō ut vel in trānsitū manūmittantur, velutī cum praetor aut prōcōnsul aut praeses in balneum vel in theātrum eat.

Lībertīnōrum autem status tripertītus anteā fuerat: nam quī manūmittēbantur, modo māiōrem et iūstam lībertātem cōnsequēbantur et fīēbant cīvēs Rōmānī, modo minōrem et Latīnī ex lēge Iūniā Norbānā fīēbant, modo īnferiōrem et fīēbant ex lēge Aeliā Sentiā dēditīciōrum numerō. Sed dēditīciōrum quidem pessima condiciō iam ex multīs temporibus in dēsuētūdinem abiit, Latīnōrum vērō nōmen nōn frequentābātur: ideōque nostra pietās, omnia augēre et in meliōrem statum redūcere dēsīderāns, in duābus cōnstitūtiōnibus hoc ēmendāvit et in prīstinum statum redūxit, quia et ā prīmīs urbis Rōmae cūnābulīs ūna atque simplex lībertās competēbat, id est eadem quam habēbat manūmissor, nisi quod scīlicet lībertīnus sit quī manūmittitur, licet manūmissor ingenuus sit. Et dēditīciōs quidem per cōnstitūtiōnem expulimus, quam prōmulgāvimus inter nostrās dēcīsiōnēs, per quās, suggerente nōbīs Tribōniānō, virō excelsō, quaestōre, antīquī iūris altercātiōnēs plācāvimus: Latīnōs autem Iūniānōs et omnem quae circā eōs fuerat observantiam aliā cōnstitūtiōne per ēiusdem quaestōris suggestiōnem corrēximus, quae inter imperiālēs radiat sānctiōnēs, et omnēs lībertōs, nūllō nec aetātis manūmissī nec dominiī manūmissōris nec in manūmissiōnis modō discrīmine habitō, sīcutī anteā observābātur, cīvitāte Rōmānā dōnāvimus: multīs additīs modīs, per quōs possit lībertās servīs cum cīvitāte Rōmānā, quae sōla in praesentī est, praestārī.

LIBER I TITVLVS II: DE IVRE NATVRALI, GENTIVM ET CIVILI

Dē iūre nātūrālī, gentium et cīvīlī

• Dē iūre nātūrālī

Iūs nātūrāle est quod nātūra omnia animālia docuit. Nam iūs istud nōn hūmānī generis proprium est, sed omnium animālium, quae in caelō, quae in terrā, quae in marī nāscuntur. Hinc dēscendit maris atque fēminae coniugātiō, quam nōs mātrimōnium appellāmus, hinc līberōrum prōcreātiō et ēducātiō: vidēmus etenim cētera quoque animālia istīus iūris *perītiā cēnsērī.

• Distīnctiō iūrīs gentium et cīuīlis, ā dēfīnītiōne et etymologiā.

Iūs autem cīuīle ā iūre gentium distinguitur, quod omnēs populī quī lēgibus et mōribus reguntur partim suō propriō, partim commūnī omnium hominum iūre ūtuntur: Nam quod quisque populus ipse sibī iūs cōnstituit, id ipsīus proprium cīvitātis est vocāturque iūs cīvīle, quasi iūs proprium ipsīus cīvitātis: quod vērō nātūrālis ratiō inter omnēs hominēs cōnstituit, id apud omnēs populōs peraequē custōdītur vocāturque iūs gentium, quasi quō iūre omnēs gentēs ūtuntur. Et populus itaque Rōmānus partim suō propriō, partim commūnī omnium hominum iūre ūtitur. Quae singula quālia sunt, suīs locīs prōpōnēmus.

• Ab appellātiōne et effectibus

Sed iūs quidem cīvīle ex unāquāque cīvitāte appellātur, velutī Athēniēnsium: nam sī quis velit Solōnis vel Dracōnis lēgēs appellāre iūs cīvīle Athēniēnsium, nōn errāverit. Sīc enim et iūs quō populus Rōmānus ūtitur iūs cīvīle Rōmānōrum appellāmus, vel iūs Quirītium, quō Quirītēs ūtuntur; Rōmānī enim ā Quirīnō Quirītēs appellantur. Sed quotiēns nōn addimus, cūius sit cīvitātis, nostrum iūs sīgnificāmus: sīcutī cum poētam dīcimus nec addimus nōmen, subaudītur apud Graecōs ēgregius Homērus, apud nōs Vergilius.

Iūs autem gentium omnī hūmānō generī commūne est. Nam, ūsū exigente et hūmānīs necessitātibus, gentēs hūmānae quaedam sibī cōnstituērunt: bella etenim orta sunt et captīvitātēs secūtae et servitūtēs, quae sunt iūrī nātūrālī contrāriae (iūre enim nātūrālī ab initiō omnēs hominēs līberī nāscēbantur); ex hōc iūre gentium et omnēs paene contractūs intrōductī sunt, ut ēmptiō, venditiō, locātiō, conductiō, societās, dēpositum, mūtuum, et aliī innumerābilēs.

PROLEGOMENA

Hōc in blog textūs continentur quōs in proximō conuenticulō Circulī Latīnī Gallaecī legēmus (quod conuenticulum postrīdiē kalendās Iūliās habēbitur). Fortasse 'cūr excerpta ad opus minimē lectum pertinentia ēlēgerim' interrogētis. Haec sunt causae:
  

1. Prīmum, quod paucī hodiē eōs textūs legunt et scopus circulī nostrī est opera omnium aetātum latīnitātis legere. 
2. Deinde, quod, sententiā meā, haec scrīpta erint magnō ūsuī sī scholās cultūs cīuīlis Rōmānī latīnē trādere uoluerimus.

Scrīpta quae praebentur dēprōmpta sunt ex hīs ēditiōnibus:

1. Ēditiō quae in the latin library extat. 
2. The institutes of Justinia with notes, Cooper Th., Philadelphia, 1812.

Secundum ūsum ūsitātissimum aetātis nostrae, quantitātēs uōcālium, quoad possem, notāre cōnstituī. Ad hoc, pāgellā in rēte quae omnium gentium dīcitur sitā ūsus sum, quae textuī trāditō quantitātēs addit. Quam pāgellam uōbīs commendō (nexum premite). Illīc, ut in programma ueniātis, hanc uiam sequiminī :

•  Accueil > Latin > Longīs, un logiciel d’aide à l’indication des quantités des voyelles des textes (...)

Itaque, spērō fore ut scrīpta aliquid commodī uōbīs adferant, etsī taediōsa sint, praecipuē post lepidissimam fābulam quae dē duōbus amantibus nūperrimē lēgimus.

• INDEX
• Dē iūre nātūrālī, gentium et cīuīlī
• Dē iūre persōnārum 

• AVXILIA:
• Iustiniani Institutiones. Recognouit Paulus Krueger. 
• Alia.